മൊബൈൽ/ ഇന്റർനെറ്റ്‌ ദുരുപയോഗം : രക്ഷിതാക്കൾ ശ്രദ്ധിക്കാൻ...

ഇത്‌ പലരും വെറുതെ വായിച്ചു തള്ളുന്ന വാർത്തകളിലൊന്ന്! എന്നാൽ
വളരെ ഗൗരവമായി ചർച്ച ചെയ്യേണ്ടതും വിലയിരുതേണ്ടതുമായ ഒരു വിഷയമാണിത്‌.

കേരളത്തിൽ വിദ്യാർത്ഥിനികൾക്കിടയിൽ കൂടി വരുന്ന ആത്മഹത്യക്കു കാരണം ഇത്തരം മൊബൈൽ, ഇന്റർനെറ്റ്‌, ഡിജിറ്റൽ കാമറ... എന്നിവയുടെ ദുരുപയോഗമാണ്.
ചതികളിൽ പെടുന്നതിനു പുറമെ പലപ്പോഴും തമാശക്കായി പരസ്പരം അറിഞ്ഞു കൊണ്ടു
തന്നെയെടുക്കുന്ന ചില രംഗങ്ങൾ ബ്‌ളൂടൂത്ത്‌ വഴി കൈമാറപ്പെടുകയും ‘കളി കാര്യമായി’ മാറപ്പെടുകയും ചെയ്യുന്നു.

തീർത്തും നിർദോഷമെന്ന് കരുതി സാധാരണ രീതിയിൽ നാം എടുക്കുന്ന, നമ്മുടെ സ്ത്രീകളുടെ ഫോട്ടോകൾ നമ്മളറിയാതെ കോപ്പിയെടുത്തു ആധുനിക സാങ്കേതിക വിദ്യകൾ (ദുരു)പയോഗപ്പെടുത്തി ഇന്റർനെറ്റ്‌ മാർക്കറ്റിൽ വിൽപനക്കെത്തുന്ന വളരെ അപകടകരമായ കാര്യം പലർക്കും അറിയില്ല... പുതിയ ഗ്രാഫിക്‌ / മോർഫിംഗ്‌ സോഫ്റ്റുവെയറുകൾ ഉപയോഗിച്ചു മാറ്റം വരുത്തുന്ന ഇത്തരം ചിത്രങ്ങൾ പലപ്പോഴും ഒറിജിനലിനെ വെല്ലുന്നതായിരിക്കും.

Facebook ൽ നിന്നും മറ്റുമൊക്കെയായി പെൺകുട്ടികളുടെ ‘മുഖ’ങ്ങൾ തട്ടിയെടുത്ത്‌ മറ്റ്‌ ഉടലുകളോടു ചേർത്ത്‌ പുതിയ പുതിയ ചിത്രങ്ങൾ നിർമിക്കുകയും ഇന്റർനെറ്റ്‌ ബ്‌ളാക്ക്‌ മാർക്കറ്റിൽ വിൽപന നടത്തുകയും ചെയ്യുന്ന പ്രഫഷണൽ ടീമുകൾ തന്നെയുണ്ട്‌ എന്നറിയുക. ഒരു ‘ഉടൽ’ കൊണ്ടു തന്നെ വിവിധ ചിത്രങ്ങൾ നിർമിക്കാനാവും എന്നതും ‘ഉടലി’ന്റെ ഉടമ തീർത്തും സുരക്ഷിതയായിരിക്കും എന്നതുമാണു ഈ മാഫിയാ
സംഘങ്ങൾക്കുള്ള നേട്ടം. സൈബർ കുറ്റങ്ങളുമായി ബന്ധപ്പെട്ട നിയമങ്ങൾ ഇപ്പോഴും പല രാജ്യങ്ങളിലും കർക്കശമല്ലാത്തതും വ്യക്തമായ തെളിവുകളുടെ അഭാവവും ഇത്തരക്കാർക്കു രക്ഷപ്പെടാൻ പഴുതു നൽകുന്നു...

നമ്മുടെ മകളുടെ / സഹോദരിയുടെ മുഖവും മറ്റാരുടേയോ പൂർണ്ണനഗ്ന ശരീരവും
ചേർത്തുണ്ടാക്കിയ ഇത്തരം ചിത്രങ്ങൾ, ഈ ‘ഫീൽഡു’മായി ബന്ധമില്ലാതിനാൽ തന്നെ ഒരിക്കൽ പോലും നമ്മൾ ഇത്‌ അറിഞ്ഞു കൊള്ളണമെന്നുമില്ല.

നമ്മുടെ ചില അശ്രദ്ധകൾക്ക്‌ പലപ്പോഴും വലിയ വില നൽകേണ്ടി വരുമെന്നറിയുക...

ഈ വിഷയവുമായി ബന്ധപ്പെട്ടു നാം ശ്രദ്ധിക്കേണ്ട ചില കാര്യങ്ങൾ താഴെ കൊടുക്കുന്നു:

1- വിദ്യാർത്ഥി/വിദ്യാർത്ഥിനികൾക്കു മൊബൈൽ നൽകാതിരിക്കുക... അത്യാവശ്യമെങ്കിൽ കാമറ, ബ്ല്യൂടൂത്ത്‌ സംവിധാനങ്ങൾ ഇല്ലാത്ത മൊബൈൽ മാത്രം നൽകുക.

2- കുട്ടികളുടെ ഇന്റർനെറ്റ്‌ ഉപയോഗം പരിമിതപ്പെടുത്തുക, എപ്പോഴും കുട്ടികളുടെ കമ്പ്യുട്ടർ / ഇന്റർനെറ്റു ഉപയോഗം അവരറിയാതെ മോണിറ്റർ ചെയ്യാൻ ശ്രദ്ധിക്കുക. അടച്ചിട്ട മുറിയിൽ വെക്കുന്നതിനു പകരം കമ്പ്യുട്ടർ വീട്ടിലെ ഹാൾ പോലുള്ള പൊതുസ്ഥലത്ത്‌ വെക്കുക.

3- കഫേകൾ വഴി ഇന്റർനെറ്റ്‌ ഉപയോഗിക്കുന്നതിൽ നിന്നും മക്കളെ വിലക്കുക.

4- ഒരിക്കലും വ്യക്തികളുടെ (പ്രത്യേകിച്ച്‌ സ്ത്രീകളുടെ / പെൺകുട്ടികളുടെ) ചിത്രങ്ങൾ വെബ്‌ സൈറ്റ്‌, ബ്ലോഗുകൾ, സോഷ്യൽ നെറ്റുവർക്കുകൾ തുടങ്ങിയവയിൽ പോസ്റ്റ്‌ ചെയ്യാതിരിക്കുക.

5- സ്ത്രീകളുടെ / പെൺകുട്ടികളുടെ ചിത്രങ്ങൾ മെയിൽ വഴി കൈമാറാതിരിക്കുക.

6- ഡിജിറ്റൽ കാമറ, മൊബൈൽ വഴി എടുത്ത ഫോട്ടോകൾ, സ്റ്റുഡിയോ നെറ്റുകഫേകൾ തുടങ്ങിയവയിൽ നിന്നും പ്രിന്റ്‌ എടുക്കാൻ കൊടുക്കുമ്പോൾ കൂടെ നിൽക്കുകയും നമ്മുടെ സീഡി/ഫ്‌ളാഷ്‌ ഡ്രൈവ്‌... എന്നിവയിൽ നിന്നും അവരുടെ കമ്പ്യുട്ടറിലേക്കു കോപ്പി ചെയ്യുന്നില്ല എന്നു ഉറപ്പ്‌ വരുത്തുക.

7- കമ്പ്യുട്ടർ നന്നാക്കാനോ / അപ്‌ഗ്രേഡ്‌ ചെയ്യാനോ മറ്റോ കടകളിൽ നൽകുന്നതിനു മുമ്പ് ഫോട്ടോകൾ അതിൽ നിന്നും മാറ്റുക. (ഫോട്ടോകളും പ്രധാന വിവരങ്ങളും കമ്പ്യൂട്ടർ ഹാർഡ്‌ ഡിസ്കിൽ സൂക്ഷിക്കുന്നതിനു പകരം ഏതെങ്കിലും എക്സ്റ്റേർണൽ ഡിവൈസിലോ, വേർഡ്‌/ എക്സെൽ ഫയലുകളിൽ പാസ്‌വേർഡ്‌ ഉപയോഗിച്ചു ലോക്ക്‌ ചെയ്തോ സൂക്ഷിച്ചാൽ കുറെയൊക്കെ സുരക്ഷിതമാവും)

8- ഷോപ്പിംഗ്‌ മാളുകളിലും മറ്റുമുള്ള പൊതു ടോയ്‌ലറ്റുകൾ, ലോഡ്ജ്‌/ഹോട്ടൽ മുറികൾ എന്നിവയിൽ രഹസ്യ ക്യാമറകൾ ഉണ്ടാവാനുള്ള സാദ്ധ്യത ശ്രദ്ധിക്കുക.

നമ്മുടെ മക്കളെ / സഹോദരിമാരെ ആത്മഹത്യയിൽ നിന്നും തടയണമെന്നുണ്ടെങ്കിൽ... നമുക്കു നിത്യ അപമാനത്തിൽ നിന്നും രക്ഷ വേണ്ടതുണ്ടെങ്കിൽ കൂടുതൽ ജാഗ്രരാവുക.